Lounès Matoub : «S laṣel d ṣfa n laεqel i yes ara nezwi Lezzayer, seg uɣuru ! Seg uɣuru ! Seg uɣuru!»

Ulayɣer nurǧa asirem

Ma nesenned ɣef ṣbar
Amsedrar ur iḥekkem
Γas yeɣra yeẓwer
Afus n lbaṭel yettwalqem
Lɣella-s d ccar
I laṣel ssamsen udem
Yeɣma yejjunǧer
Jegren-tt s ddin d taεrabt
Tamurt n Lezzayer
D uɣuru! d uɣuru! d uɣuru!

D ungif ibubben tabburt
Akken i wen-teḍra
Ma tɣilem ad ḍelqen i tasarutt
Tesεam nniyya
Win iεerḍen tacriḥt n tsekkurt
Ur iqenneε ara
D dwa-s ad ncerreg tamurt
Ad nebrez tura
Amar assen ay atma
Ad tnaqel Lezzayer
Seg uɣuru! Seg uɣuru ! Seg uɣuru !

Maççi d yiwen i d-izeḍmen
Yennsenta tuccar
Ay amcum seg-neɣ yeffɣen
Yeǧǧa-d tisigar
Di Lezzayer tagmatt tuḍen
Tenṭar ur tettnekkar
Ssus iṛebba acciwen
Ad yesni idurar
Iεeṭṭel ad d-yejbu liser
Ara tt-ifersen
Seg uɣuru! Seg uɣuru ! Seg uɣuru !

Xas yeqqed-aɣ laẓ d facal
Γef ṣber ur nettsennid
Skud mazal tarwa n leḥlal
Ur s-nkennu I lqid
Akken yebɣa izellez uzaylal
Ur nxellef abrid
I yemmaren d tiḥemmal
Ur neffiɣ f lǧid
S laṣel d ṣfa n laεqel
I yes ara nezwi Lezzayer
Seg uɣuru! Seg uɣuru! Seg uɣuru!